VISITA: BLANCA INÉS FERNÁNDEZ

La escritora yerbata Blanca Inés Fernández Quintana, antigua alumna del IES Peñamayor de Nava, vieno´l llunes 20 de marzu a reflexionar sobre la so trayectoria lliteraria colos alumnos de 1ºBachilleratu, 4º, 2º y 1º ESO.

Ya lleva dos años trabayando de profesora de llingua asturiana nel institutu Conceyu de Tinéu. Fizo un repasu a la so trayectoria lliteraria dende los sos entamos con relatos curtios na revista “Formientu”

Asoleyó la so primer novela "L'Home de les Caparines" na primavera del añu 2021, convirtiéndose asina na novelista más moza de les lletres asturianes. Esi mesmu añu ganó'l I Premiu Radagast con otra novela, de nome "Trovadoresca", asina como'l Premiu «Enriqueta González Rubín» de Narrativa Moza n’asturianu, pola so obra "No que cinca los seres de lleenda".

L´autora tien l´envís d´escribir obres con perspectiva de xéneru, dalgo que ye novedoso na lliteratura asturiana.

Animó a los alumnos a presentase a los diferentes concursos lliterarios que s´ufierten, amás tuvo a bien firmar y dedicar los sos llibros que tán a disposición del alumnau na biblioteca del centru.