EL 12 Payares el nuesu cole cellebró una de les fiestes más tradicionales d’Asturies, “L’Amagüesto”, na que participaron tolos neños y neñes del cole.

L'actividá busca, aparte del aspeutu lúdicu, consiguir unos oxetivos:

• Espertar l'interés por conocer les traces característiques d'una manifestación cultural asturiana.
• Reconocencia de la necesidá de caltener les nueses tradiciones.
• Acomuñar la fiesta a una determinada dómina del añu.

Per otru llau, pretendióse esfrutar d'una xornada festiva de la que conocer y recuperar aquellos xuegos tradicionales colos que podíen entretenese los nuesos antepasaos.

El programa foi mui estensu ya variáu:

1. Axenda didáutica escolar.

La Conseyería d’Educación, Cultura y Deporte del Principáu d’Asturies plantega la convocatoria de la Axenda Didáctica Escolar, dirixida a que l’alumnáu de la comunidá autónoma pueda reforzar y ampliar el so aprendizaxe del asturianu o del gallego-asturianu con actividaes complementaries que fomenten l’usu de la llingua en distintos contestos.

Nesti casu, l'actividá, “Cantares de... y pa neños”, consistió nun conciertu interpretáu por "A Mansalva (Fernando Valle Roso y instrumentista), onde los neños y neñes foron protagonistes xunto a los músicos y los sos instrumentos.

El conciertu desarrollóse na Casa de la Cultura de Teberga.

2. Pregón del Amagüesto

Los neños y neñes, de sestu cursu, lleeron el Pregón que dio pasu al restu d’actividaes.

3. Desfile

Tolos escolinos y escolines del colexu, desfilaron, xunto al profesoráu, peles cais del pueblu acompañaos d’un gaiteru y un tamboriteru. Na comitiva diba tamién Pinocho, que nos sorprendió pol bon comportamientu y gran paciencia.

4. Bailles tradicionales

Ya nel colexu llegó’l momento de baillar acompañaos del gaiteru y el tamboriteru. Los neños y neñes atreviéronse con Dancites, Xotes, Danza Prima…

5. Magüesto

Gracies a l´Asociación de persones mayores de Teberga, qu’amagostaron les castañes, tolos escolinos y escolines pudieron esfrutar xintando castañes y bebiendo zumu mazana.

6. Taller del miel

Dempués de la xinta, desarrollóse un taller de miel impartíu por “Avanza Teverga”.

Esti taller pretendía que l’alumnáu conociera el procesu del miel, la importancia y el mundu de les abeyes y a estremar el sabor y golor del miel a traviés d'una degustación de la mesma.

7. Xuegos tradicionales

Nun podíen faltar los xuegos tradicionales, carrera de panoyes, pañuelu, carrera de sacos, carrera de llecheres, tiru-soga, bolos, …

8. Espicha

Yá pa finar, tanto neños, neñes como mayestros y mayestres esfrutamos d’una espicha nel comedor del cole.

Pue decise que, amás de que toos lo pasamos perbién, los escolinos y escolines deprendieron munches coses de la nuesa cultura y tradición asturiana.

Agradecemos a toles persones ya instituciones collaboradores la so participación.

• CONSEYERÍA D´EDUCACIÓN Y CULTURA DEL PRINCIPÁU D´ASTURIES.
• ASOCIACIÓN DE PERSONES MAYORES DE TEBERGA.
• ASOCIACIÓN AVANZA TEBERGA.
• ESCUELA MÚSICA TRADICIONAL DE TEBERGA.
• AYUNTAMIENTU TEBERGA.